Tapik ni Bro

               Sa nakaraang mga bagyo at baha, ang mga taga Negros Occidental, Leyte, Metro Manila ang nakaranas na siguro ng pinakamalubhang hagupit nito na nagdala ng pagkasira ng bahay,
pagkaupos ng ari-arian at pati na rin ang pagkitil sa buhay. Wala pang dalawang linggo ang dumaan, pumanhik na naman ang isa pang delubyo.   Walang pinipiling lugar ang hagupit ng kalikasan maski sa mga ibang bansa ay natatamaan din at nang-iiwan ito ng maraming pagkawasak sa mga ari-arian, kabuhayan at buhay. Sa malas, ito'y ngitngit ng langit. Ngunit kung ating kikilatising mabuti, ito'y tapik ni Bro. Tapik sa ating mga balikat upang tayo'y paalalahanan na kahit ano pa man ang mangyari dapat hindi natin kalimutan si Bro sa anumang unos ng buhay. Bakit ang mga mauunlad na lugar ay siyang sinalanta ng delubyo? Panahon na siguro upang ang mga namumuno ay magbago. Magbago sa hangarin sa buhay na hindi pera lamang ang ninanais kundi kapayapaan, pagkakaisa at kasaganahan din. Ang mga mamamayan ay tumutulong, bakit kaya nagkaganon? Walang pinuntahan ang tubig. Ibig sabihin, barado ang mga kanal dahil sa suson-susong basura at dahil na rin sa walang disiplina ang mga tao. Paalala ni Bro sa mga opisyales, gawin ang tungkulin at huwag mangurakot sa kaban ng bayan lalo't para sa kapakanan ng tao at sa ikabubuti ng nakararami, ilaan na lamang nating pangtulong sa mga kapus-palad. Sa mga mamamayan, tumulong tayo kahit sa simpleng paraan lamang. Dapat nating ilagay ang mga basura sa dapat nilang kalagyan at huwag din magtapun kung saan-saan lang para sa gayon, hindi magbarado ang mga kanal na siyang daluyan ng tubig. Bulong din niya na dapat sa gitna ng unos, tulong-tulong at magkaisa ang lahat para sa gayon tayo rin ang makikinabang sa pag-unlad ng ating buhay pati na rin ang ikaa-angat ng ating bansang ating kinalakhan.

            Kaya ang Tapik ni Bro ay isang babala sa atin. Maging handa at tanggapin ang idudulot nito at sana, huwag natin balewalain dahil sa susunod, di lang tapik sa balikat ang matitikman natin kundi ngit-ngit ng Poong Maykapal. Magpasalamat pa rin tayo sa kanya dahil sa kabila ng lahat na pagsubok na nagdaan, heto pa rin tayo nakatayo, hindi nawawalan ng pag-asa at tayo'y nabubuhay pa at kahit papaano'y nakaligtas naman tayo sa mga pagsubok na ibinigay niya sa atin.